“Ուկրաինայի հրեական համայնքը դիմել է նախագահ Յուշչենկոյին, որպեսզի Ուկրաինան ճանաչի հայերի ցեղասպանությունը”, – այսօր “Ցեղասպանությունն ու մարդու իրավունքները” համաժողովի ընդմիջմանն ասաց Ուկրաինայի հրեական համայնքի ներկայացուցիչ Յոզեֆ Զիսելսը:
Նա համոզված է, որ եթե աշխարհը ուշադրություն դարձներ հայերի հետ կատարվածին, չէր լինի ոչ Ուկրաինայի սովը, ոչ հրեաների Հոլոքոստը: Պարոն Զիսելսը շատ կարեւորեց նաւ Իսրայելի կողմից Եղեռնի ճանաչումը: ՀՀ վարչապետ Անդրանիկ Մարգարյանն ուրախ էր, որ հրեա ժողովուրդը լավ է հասկանում հայերի ցեղասպանության չճանաչման հետեւանքների ազդեցությունը Հոլոքոստի վրա: Միաժամանակ վարչապետը հույս հայտնեց, որ Ուկրաինան կճանաչի հայերի ցեղասպանությունը, եթե “հրեական համայնքը գործին կպնի”: Իսրայելի կրթության նախկին նախարար, Կնեսետի (խորհրդարանի-խմբ.) պատգամավոր Յոսի Սարիդն ավելի վաղ ասել էր, որ հայերի հետ կատարվածը չճանաչելով` Իսրայելը չի ճանաչում նաեւ երկրորդ համաշխարհային պատերազմում հրեաների հետ կատարվածը: Այսօր նա վստահեցրեց, որ Իսրայելում մեծամասնություն են նրանք, ովքեր ընդունում են հայերի Եղեռնը:
Պարոն Սարիդն ասաց, որ ինքը թուրքերի թշնամին չէ: “Աստված պահի նրանց”, – կոչով դիմելուց առաջ ասաց Կնեսետի պատգամավորը: Այնուհետեւ նա դիմեց թուրքերին. “Դուք պետք է պատասխանատվություն կրեք հայերի ցեղասպանության համար: Դա ճշմարտություն է, որի հետ անմիջական կապ չեք ունեցել, եւ դուք չեք ցեղասպանողը: Բայց դուք պետք է ձեզ վրա պատմական պատասխանատվություն վերցնեք: Մեզ համար դա կարեւոր է` ցեղասպանությունը չի կարող մի կողմ թողնվել առանց պատասխանատվության, ցեղասպանությունը չի կարող որբ մնալ եւ այն որբ չէ”: