Նովոստի-Արմենիա – Հայաստանի գազաֆիկացումը էապես գերազանցում է Ռուսաստանի գազաֆիկացման մակարդակը, չորեքշաբթի Երևանում լրագրողներին հայտարարեց “Գազպրոմ” ԲԲԸ վարչության փոխնախագահ, “ՀայՌուսգազարդ” ՓԲԸ տնօրենների խորհրդի նախագահ Վալերի Գոլուբևը՝ ձեռնարկության 10-ամյակի կապակցությամբ այցի ընթացքում։
“Ռուսաստանի միայն առանձին տարածաշրջաններում և մարզերում է գազաֆիկացման մակարդակը հասնում այն ցուցանիշին, որն այսօր, ընդհանուր առմամբ, ունի Հայաստանը”,- ասաց նա։
Գոլուբևը նշեց, որ դա մեծ ձեռքբերում է և բիզնեսի բոլոր մակարդակներին, ինչպես նաև բնակչությանը այսօր հնարավորություն է տալիս հավասարապես օգտվել էկոլոգիապես այնպիսի շահավետ և համեմատաբար էժան էներգիայի աղբյուրից, ինչպիսին է գազը։
“Գազպրոմի” ներկայացուցիչ լինելով՝ կարող եմ հաստատել, որ մեր ընկերությունը նախանձում և գլուխ է խոնարհում այն ձեռքբերումների առջև, որոնց հասել է Հայաստանը”,- ընդգծեց նա։
Մինչ այդ “ՀայՌուսգազարդ” ՓԲԸ գլխավոր տնօրեն Կարեն Կարապետյանը նշել էր, որ Հայաստանը գազաֆիկացման մակարդակով մտնում է աշխարհի երկրների առաջատարների ցուցակի մեջ։ Նա տեղեկացրել էր, որ 2002թ.-ից մինչև 2007թ. հուլիսի 1-ը գազաֆիկացման մակարդակը հաջողվել է հասցնել մինչև 87,3 տոկոսի՝ ընդդեմ 21 տոկոսի, որ գրանցվել էր նախքան գազաֆիկացման ծրագրի իրականացումը։
Ներկայումս Հայաստանում բնական գազ են ստանում 446 բնակավայրեր, որոնցից 98-ը նախկինում գազաֆիկացված չէին։ Բնակչության շրջանում բնական գազից օգտվող բաժանորդների ընդհանուր թիվը 2002թ. սկզբի 112 հազարից 2007թ. առաջին կիսամյակի վերջում ավելացել է մինչև 468 հազարի։
Սեպտեմբերի 12-ին ընկերության 10-ամյակին նվիրված ՀՀ նախագահ Ռոբերտ Քոչարյանի “ՀայՌուսգազարդ” ՓԲԸ այցի շրջանակներում, տեղի ունեցավ խորհրդակցություն ընկերության բաժնետերերի, հիմնական գործընկերների և խոշոր գործարանների ներկայացուցիչների մասնակցությամբ, որի ընթացքում ներկայացվեց ձեռնարկության տասնամյա գործունեության հաշվետվությունը։
“ՀայՌուսգազարդ” ՓԲԸ-ն Հայաստանի ներքին շուկայում ռուսական բնական գազի մատակարարման և բաշխման մենաշնորհային իրավունք ունի։
Ընկերությունը ստեղծվել է 1997թ., ներկայումս նրա կապիտալը կազմում է 580 մլն. դոլար, բաժնետերերն են՝ “Գազպրոմ” ՍՊԸ (57,59 տոկոս), ՀՀ էներգետիկայի նախարարությունը (34,7 տոկս) և նավթի ու գազի “Իտերա” ընկերությունը (7,71 տոկոս)։
Նովոստի-Արմենիա