Արման Բաբաջանյանը ներողություն է խնդրել Ռոբերտ Քոչարյանի ընտանիքից
23.06.2005. Главы Армении и России обсудили в Москве двусторонние
07 Հուն 2013  
07.06.2013  |  11:58   |   Ելույթներ և ուղերձներ

14.04.2007. ՀՀ ՆԱԽԱԳԱՀԻ ԵԼՈՒՅԹԸ ԱՐԱԲԱԿԱՆ ՊԵՏՈՒԹՅՈՒՆՆԵՐԻ ԼԻԳԱՅՈՒՄ /Կահիրե/

Մեծարգո գլխավոր քարտուղար, հարգարժան դեսպաններ, տիկնայք և պարոնայք,

Ուրախ եմ այցելել արաբական աշխարհը համախմբող այս հեղինակավոր կազմակերպության կենտրոնակայան: Եգիպտոսում ես գտնվում եմ պաշտոնական այցով` Եգիպտոսի Նախագահ Հոսնի Մուբարաքի հրավերով: Հիացնում են հազարամյակների պատմություն ունեցող այս պետության ժամանակակից և առաջադեմ պատկերը, զարգացման տեմպերը: Հայ-եգիպտական կապերն ընդարձակ են և բազմաշերտ: Դրանց հետագա խորացումը մեր բանակցությունների հիմնական առարկան է:

Արաբական աշխարհի հետ Հայաստանի հարաբերություններն ու բարեկամությունն ունեն մեծ պատմություն: Դարեր շարունակ ապրելով կողք կողքի` մեր ժողովուրդներն ունեն միմիանց ավանդույթների և կրոնի, մտածելակերպի ու կենցաղի խոր իմացություն, ձևավորվել է փոխադարձ վստահություն և հարգանք:

Հայերն ու արաբները մշտապես միմյանց ձեռք են մեկնել ամենադժվարին պահերին: Այսպես եղավ, երբ հայ ժողովուրդը ցեղասպանության ենթարկվեց Օսմանյան Թուրքիայում: Արաբական երկրներն առաջինն էին, որ օգնության ձեռք մեկնեցին` ապաստան տրամադրելով և հնարավոր աջակցություն ցուցաբերելով հարյուր հազարվոր մարդկանց: Հայերը ոչ միայն գոյատևեցին արաբական երկրներում, այլև ոտքի կանգնեցին, դարձան այդ երկրների նվիրյալ քաղաքացիներ` պահպանելով ազգային ինքնությունը: Պատահական չէ, որ այսօր հայկական համայնքներ կան գրեթե բոլոր արաբական երկրներում:

Հայ ժողովուրդը  երբևիցե չի կարող մոռանալ արաբ ժողովրդի նման վերաբերմունքը, և դա, բնականաբար, իր արտացոլումն ունի նաև Հայաստանի արտաքին քաղաքականության մեջ: Անկախության ձեռքբերումից ի վեր Հայաստանի Հանրապետությունը նպատակամղված կերպով զարգացրել է իր հարաբերությունները արաբական երկրների հետ և մշտապես իր համերաշխությունը հայտնել մերձավորարևելյան խաղաղ գործընթացում արաբական դիրքորոշմանը:

Մերձավոր Արևելքն այսօր ապրում է իր նորագույն պատմության թերևս ամենաբարդ և բախտորոշ ժամանակաշրջանը: Տարածաշրջանում ծավալված անհաշտ պայքարը սպառնում է ընդգրկել ավելի ու ավելի մեծ թվով երկրներ` վտանգելով ոչ միայն տարածաշրջանային, այլև միջազգային կայունությանը: 
Համոզված եմ, որ տարածաշրջանային կայունության և անվտանգության հաստատման գործում առանցքային նշանակություն ունի Պաղեստինի անկախ պետության ստեղծումը: Դա ուղղակիորեն կնպաստի տարածաշրջանում լարվածության չեզոքացմանը, արդար և տևական խաղաղության հաստատմանը: Բոլորս ուզում ենք հուսալ, որ Պաղեստինի նոր կառավարությանը կհաջողվի կայունացնել իրավիճակը ու նոր հեռանկարներ բացել ժողովրդի բարգավաճման ու զարգացման համար:

Իրաքում տեղի ունեցող իրադարձությունները շարունակում են մնալ միջազգային հանրության ուշադրության կենտրոնում: Իրաքի բոլոր համայնքների կողքին պատերազմի զրկանքներն է կիսում նաև իրաքահայ համայնքը: Հայաստանը անկեղծորեն շահագրգռված է տեսնել Իրաքն ինքնիշխան, կայուն և անվտանգ պետություն:

Մեր պատկերացմամբ Իրաքում կարգավորման գործընթացը պետք է ընթանա երեք զուգահեռ ուղղություններով`
- ներքին էթնո-կոնֆեսիոնալ երկխոսության հաստատում,
- շահագրգիռ պետությունների պոզիտիվ ներգրավումը խաղաղ գործընթացին,
- արտասահմանյան ռազմական ներկայության փուլային կրճատում:

Այսինքն, կարգավորումը պետք է ելնի հակամարտող կողմերի հաշտեցման բնական և հասկանալի տրամաբանությունից:

Լիբանանում ստեղծված պայթունավտանգ իրավիճակը լուրջ մտահոգության պատճառ է հանդիսանում: Լիբանանի հետ մեր կապերն բացառիկ բնույթ են կրում: Այնտեղ տեղի ունեցող իրադարձությունները մեզ առանձնահատուկ ցավ են պատճառում: Հիասքանչ այդ երկրում կայունության և հուսալի անվտանգության հաստատումը դարձել է հրամայական ամբողջ տարածաշրջանի համար:
 
Հարգելի տիկնայք և պարոնայք,

Հայաստանի Հանրապետության արտաքին քաղաքականությունը նշանավորվում է երկու հիմնական սկզբունքներով` ներգրավվածություն և փոխլրացում: Մենք հետևողականորեն ընդլայնում ենք մեր միջազգային ներգրավվածությունը` պահպանելով ավանդական կապերը: Մեր արտաքին կապերը կառուցում ենք մեր գործընկերների շահերի համադրման, ոչ թե դրանց բախման դաշտում:

Հայաստանի Հանրապետությունը կառուցվում է որպես ազատական տնտեսություն ունեցող ժողովրդավարական պետություն: Առանց բնական պաշարներով հարուստ լինելու` մեզ հաջողվել է վերջին վեց տարիների ընթացքում ապահովել տարեկան երկնիշ տնտեսական աճ, միջինը` ավելի քան 12.5 տոկոսի չափով:

Մենք ձգտում ենք ունենալ գիտատար տնտեսություն և դառնալ մտավոր ծառայությունների տարածաշրանային կենտրոն: Դրա հետ մեկտեղ ակտիվ զարգանում են լեռնամետալուրգիայի, շինարարության, գյուղատնտեսության և սննդամշակման ոլորտները: Հայաստանն ապահովում է մրցակցային գործարարության բարենպաստ պայմաններ և ներդրումների պաշտպանվածության բարձր մակարդակ: Երևանում գործում են բազմաթիվ միջազգային կրթական կենտրոններ, այդ թվում` հայ-ֆրանսիական, հայ-ռուսական և ամերիկյան համալսարանները: Իսկ Երևանի պետական բժշկական համալսարանն ունի հարուստ փորձ արտասահմանցի ուսանողների ուսման կազմակերպման գործում, այդ թվում` արաբական երկրներից:

Մեծ են հնարավորությունները նաև զբոսաշրջության ոլորտում: Մի շարք արաբական երկրներ այդ ուղղությամբ մեծ փորձ են ձեռք բերել, և այն կարող է օգտակար և հետաքրքիր լինել նաև մեզ համար:

Տիկնայք և պարոնայք,

Վստահ եմ, Ձեզ հետաքրքրում է Լեռնային Ղարաբաղի հակամարտության կարգավորման գործընթացը: Ղարաբաղյան հակամարտությունը Ադրբեջանը հաճախ ներկայացնում է որպես տարածքային պահանջ կամ կրոնական հակամարտություն: Դա խորապես փոխում է խնդրի էությունը:

Լեռնային Ղարաբաղի ժողովուրդն իրեն պարտադրված պատերազմում պաշտպանեց իր պատմական հայրենիքում ազատ ապրելու և սեփական ճակատագիրը տնօրինելու իրավունքնը: Դա պայքար է միջազգայնորեն ճանաչված ինքնորոշման իրավունքի համար:
 
Արաբական բազմաթիվ պետություններ նվաճել են իրենց անկախությունը ապագաղութականացման շրջանում: Երբ փլուզվում են կայսրությունները, ժողովուրդները ստանում են ինքնորոշվելու հնարավորություն, և դա հանգեցնում է նոր պետությունների առաջացմանը: Խորհրդային Միության փլուզումը հենց այդպիսի զարգացման դասական օրինակ է, որի արդյունքում Լեռնային Ղարաբաղի ժողովուրդը ինքնորոշվեց` ստեղծելով իր անկախ պետությունը: Միակ տարբերությունը ժամանակահատվածն է:

Խորհրդային Միությունը փլուզվել է ընդամենը 15 տարի առաջ` նշանավորելով գլոբալ գաղափարախոսական հակադրության ավարտը: Ի դեպ, անկախ Ադրբեջանի կազմում Ղարաբաղն երբեևէ չի եղել:

Այօր խնդիրը գտել է իր փաստացի լուծումը. Լեռնային Ղարաբաղի Հանրապետությունը դեռ չճանանչված, բայց արդյունավետ պետություն է: Ժողովուրդը պարբերական ընտրությունների միջոցով ձևավորում է իր իշխանության մարմինները: Հանրաքվեով հաստատվել է Սահմանադրությունը, ձևավորվել է կանոնավոր և մարտունակ բանակ, առաջընթաց է ապրում տնտեսությունը:

Իրավական դաշտում Հայաստանը ձգտում է այդ բարդ խնդիրը կարգավորել բանակցային ճանապարհով և հասնել Լեռնային Ղարաբաղի ժողովրդի ազատ ինքնորոշման իրավունքի միջազգային ճանաչմանը: 1994 թվականից հակամարտության գոտում գործում է զինադադար: ԱՄՆ, Ռուսաստանի և Ֆրանսիայի միջնորդությամբ պարբերաբար տեղի են ունենում Հայաստանի եւ Ադրբեջանի նախագահների եւ արտգործնախարարների հանդիպումներ, որոնց ընթացքում փորձում ենք փոխհամաձայնության գալ: Դա բանակցությունների լավագույն ձևաչափը չէ: Կարծում ենք, որ բանակցությունները պետք է վարվեն Լեռնային Ղարաբաղի Հանրապետության և Ադրբեջանի միջև` Հայաստանի մասնակցությամբ: Համարում եմ, որ դա առաջընթացի բացակայության պատճառներից մեկն է:

Մենք բարձր ենք գնահատում ԵԱՀԿ միջնորդական ջանքերը և համարում ենք, որ հակամարտության կարգավորման համար այն լավագույն միջազգային ձևաչափն է: Գործընթացին մեծապես վնասում են դրանից դուրս ղարաբաղյան կարգավորման շուրջ այլ կառույցներում ընդունվող բանաձևերն ու դրանցում տեղ գտնող ձևակերպումները: Ձեր միջոցով կոչ եմ անում Ձեր կառավարություններին ձեռնպահ մնալ տարբեր կազմակերպություններում այս խնդրի շուրջ բանակցային գործընթացի հետ առնչություն չունեցող բանաձևերին միանալուց:

Մեծարգո Գլխավոր քարտուղար, 

Մենք բարձր ենք գնահատում Արաբական պետությունների լիգայի դերը արաբական երկրների ինքնիշխանության ամրապնդման և արաբական համերաշխության ապահովման գործում: Չնայած բազմաթիվ փորձությունների, Լիգան շարունակում է ապացուցել իր կենսունակությունն ու կարևորությունը: Մենք համոզված ենք, որ Լիգան կարող է վճռորոշ դեր խաղալ տարածաշրջանում կայունության հաստատման, ընդհանուր մարտահրավերներին համատեղ դիմակայելու գործում: Ես հաջողություն եմ մաղթում ձեր գործունեությանն ու բոլոր նախաձեռնություններին: 

Արաբական երկրների հետ Հայաստանի հարաբերությունները թևակոխել են զարգացման նոր ժամանակաշրջան: Բարձր մակարդակի վրա են մեր երկկողմ կապերը, ընթանում է շահագրգռված քաղաքական երկխոսություն: Ընդարձակվում է առևտրա-տնտեսական  համագործակցությունը, կա ակտիվություն նաև հումանիտար ոլորտներում: Մենք ձգտում ենք էլ ավելի խորացնել հարաբերությունները բոլոր արաբական երկրների հետ` ընդգրկելով փոխշահավետ համագործակցության նորանոր բնագավառներ:

Մենք տեսնում ենք դրա մեծ ներուժը, հատկապես եթե արդյունավետ համագործակցենք նաև Արաբական լիգայի շրջանակներում: Այդ ուղղությամբ արված առաջին քայլն է երկու տարի առաջ Արաբական Լիգայի և Հայաստանի արտգործնախարարության միջև ստորագրված համագործակցության հուշագիրը: Մենք համոզված ենք, որ համատեղ ջանքներով հնարավոր է կառուցել առավել անվտանգ ու բարգավաճ աշխարհ, ուր տեղ չի լինի կրոնական անհանդուրժողականության ու ռասսայական խտրականության, ազգամիջյան թշնամանքի ու ատելության համար: Շնորհակալություն:

Լուսանկարներ
|
ՆաԵՎ կարող է հետաքրքրել
 
 
 
 
 
 
 
 
 
 
 
 
 
 
 
 
 
 
 
 
 
 
25.07.2018
Սա Մարտի 1-ը բացահայտե՞լու փորձ է, թե՞ հաշիվ մաքրելու. Սողոմոնյան

ՀՀ երկրորդ նախագահ Ռոբերտ Քոչարյանն այսօր կվերադառնա Հայաստան։ Նա սովորաբար ամեն տարի հուլիսի սկզբին մեկնում է Հայաստանից եւ վերադառնում ամսվա վերջին։ Վերադառնալու հաջորդ օրը՝ հուլիսի 26-ին, Հատուկ քննչական ծառայությունը Քոչարյանին հրավիրել է հարցաքննության Մարտի 1-ի գործով։ ՀՔԾ-ն մինչ այդ ծանուցագիր էր ուղարկել Քոչարյանին՝ նրան հրավիրելով հարցաքննության, բայց քանի որ ՀՀ երկրորդ նախագահը գտնվում էր արտերկրում, ՀՔԾ-ն համաձայնեց սպասել, մինչեւ նա վերադառնա։ Բայց մի փոքր, «խիստ տեխնիկական» հարց կա, որը մինչեւ հիմա նրա գրասենյակը չի կարգավորել՝ որտե՞ղ է տեղի ունենալու Քոչարյանի հարցաքննությունը՝ Հատուկ քննչական ծառայությունո՞ւմ, թե՞ իր նախընտրած վայրում։ Սա նրա գրասենյակի ղեկավար Վիկտոր Սողոմոնյանը երեկ մեզ հետ զրույցում համարեց տեխնիկական հարց, որով զբաղվում են համապատասխան պատասխանատու անձինք։ Բայց, դատելով նրա հայտարարություններից, այս տեխնիկական հարցն իր մեջ որոշակի ամբիցիաներ է պարունակում՝ պայմանավորված Քոչարյանի ստատուսով։ Կարճ ասած՝ Քոչարյանն ուզում է, որ ՀՔԾ-ն գա իր մոտ, ոչ թե ինքը գնա ՀՔԾ, թեպետ ՀՔԾ պետն արդեն հասկացրել է, թե որ դեպքերում են հարցաքննությունը կազմակերպում անձի նախընտրած վայրում, եւ այդ դեպքերի մեջ Քոչարյանի պարագան կարծես թե չի մտնում։

 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
22.04.2014
ՀԱՐՑԱԶՐՈՒՅՑԻ ՇԱՐՈՒՆԱԿՈՒԹՅՈՒՆ

Հարգելի այցելուներ,
Ձեր ուշադրությանն ենք ներկայացնում ՀՀ երկրորդ նախագահ Ռոբերտ Քոչարյանի՝ մեր կայքին տված հարցազրույցի շարունակությունը: Մենք խնդրել էինք նախագահ Քոչարյանին անդրադառնալ վերջին շրջանում ամենաքննարկվող թեմաներից մեկին՝ Սահմանադրության բարեփոխումներին, ինչպես նաև մի քանի այլ արդիական հարցերի: Տեղեկացնենք նաև, որ մենք հարցերի մի նոր խմբաքանակ ենք ներկայացրել երկրորդ նախագահի գրասենյակ: Հարցերն առնչվում են մի շարք օրակարգային խնդիրների. այսպես կոչված կարմիր գծերին, երթևեկության խախտումներն արձանագրող տեսախցիկներին ու տուգանքների անհամաչափությանը, Որոտանի ՀԷԿ-ի կասկածելի վաճառքին և այլն: Հուսով ենք, որ մոտ ապագայում հնարավորություն կունենանք տեղեկանալ Ռոբերտ Քոչարյանի տեսակետներին նաև այս հարցերի վերաբերյալ և մի նոր հարցազրույց կներկայացնենք մեր ընթերցողներին:  

 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
www.2rd.am և www.2nd.am կայքերի այցելուների կողմից մեզ ուղարկվող բոլոր նյութերը անկախ ձևից, քանակից և ծավալից ամբողջապես կամ հատվածաբար տեղադրվում են էջում միայն կայքի քաղաքականությանը համապատասխանելու դեպքում: