Սեպտեմբերի 1-ը` համազորային նոր մասնաշենքով

Վազգեն Սարգսյանի անվան ռազմական ինստիտուտն այս տարի նորովի՝ ժամանակակից ոճով ձեւավորված եւ արդիական տեխնիկայով զինված լուսավոր եւ ընդարձակ լսարաններով, կոկիկ եւ հարմարավետ առանձնասենյակներով համալրված նոր մասնաշենքով, դիմավորեց ուսումնական նոր շրջանը:

Երեկ այս կապակցությամբ, նաեւ հայոց բանակի ապագա սպաներին, ինստիտուտի ղեկավարությանը եւ դասախոսական կազմին սեպտեմբերի 1-ի, այսինքն՝ գիտելիքի եւ դպրության օրվա առթիվ շնորհավորելու համար, վաղ առավոտյան, պաշտպանության նախարար Սերժ Սարգսյանի եւ կառավարության այլ անդամների ուղեկցությամբ, ռազմական ինստիտուտ էր այցելել զինված ուժերի գլխավոր հրամանատար, նախագահ Ռոբերտ Քոչարյանը:

Կուրսանտները, ինչպես միշտ, պաշտոնական արարողակարգի բոլոր ատրիբուտներով դիմավորեցին գլխավոր հրամանատարին: Ողջույնի արարողությունից եւ կուրսանտների մասնակցությամբ տեղի ունեցած մինի-շքերթն ընդունելուց հետո, նախագահն այցելեց ուսումնական նոր մասնաշենքի բոլոր հարկաբաժինները, մեկ առ մեկ շրջեց դասասենյակներով, պահեստանոցներով, եւ դասախոսական անձնակազմի համար նախատեսված սենյակներով, այնուհետ եղավ կենտրոնական (վարչական) մասնաշենքում:

Ինստիտուտի ղեկավարության հետ անցկացված կարճատեւ խորհրդակցությունից հետո Ռ.Քոչարյանը ձեռնպահ մնաց մեկնաբանություններից՝ լրագրողներին հետաքրքրող հարցերին պատասխանելու առաքելությունը վերապահելով պաշտպանության նախարարին: Այնուհանդերձ ակնհայտ էր, որ նախագահը գոհ էր սպայական կադրերի այս դարբնոցում արձանագրված բարենորոգումներից: Ինչը, նկատենք, միանգամայն հասկանալի է՝ նկատի ունենալով, մասնավորապես, այն իրողությունը, որ ռազմական ինստիտուտի՝ մինչ օրս, ըստ էության, «երկփեղկված» կառույցը այսուհետ կենտրոնացված կլինի "միասնական" տարածքում:

Բանն այն է, որ ինստիտուտի երկու ֆակուլտետներից մեկը՝ հրետանային ֆակուլտետը, այստեղ է տեղակայված դեռեւս 1994 թվականից, երբ հիմնադրվեց իր տեսակի մեջ եզակի այս կրթական հաստատությունը: Մինչդեռ համազորային ֆակուլտետը գտնվում էր ԵՊՀ նախկին (ռազմական ամբիոնի) մասնաշենքում: Ինչը, բնականաբար, լրացուցիչ դժվարություններ էր ստեղծում թե՛ կուրսանտների, թե՛ դասախոսական կազմի համար ինչպես ժամանակի, այնպես էլ տրանսպորտային անհարմարությունների առումով: Եւ, իհարկե, ուրախալի է, որ այսուհետ համազորային ֆակուլտետը՝ բոլոր երեք (կրակային, մարտավարության եւ զորատեսակների) ամբիոններով, դասակներով եւ մասնագիտացված դասասենյակներով հանդերձ, տեղակայված կլինի նորակառույց մասնաշենքում:

Ռազմական ինստիտուտի պետ Ստեփան Միրզոյանի հավաստմամբ, կարեւորն այն է, որ զինվորական կրթությունը մեր երիտասարդների շրջանում գնալով ավելի ու ավելի "պոպուլյար" է դառնում, եւ "ինստիտուտը այսօր կուրսանտների պրոբլեմ չունի: Մեր ուսումնատեխնիկական բազան ամեն տարի ընդլայնվում է, բարձրանում է ուսանողների պատրաստականության աստիճանը եւ գիտելիքների որակը, եւ մենք բանակին տարեցտարի ավելի ու ավելի որակյալ, պատրաստված սպաներ ենք տալիս":

Այսօրվա դրությամբ ռազմական ինստիտուտում սովորում է ավելի քան 1000 ուսանող. միայն այս տարի նրանց թիվը համալրվել է հայոց բանակի մոտ 300 ապագա սպաներով: Ընդսմին` Ս.Միրզոյանի հավաստմամբ, "քննություններն անցել են առանց միջադեպերի, հարթ եւ թափանցիկ: Համենայն դեպս, ոչ մի բողոք չի գրանցվել, կարելի է ասել՝ ընդունվել են արժանավորներից արժանավորները":

Ավելացնենք, որ ուսանողական նոր մասնաշենքը կառուցվել է "զրոյից"՝ երկու տարվա ընթացքում, բյուջետային հատկացումների, մի քիչ էլ՝ նախարարության ռեզերվային միջոցների հաշվին:

www.armworld.am