Ցուցահանդեսը նաԵՎ հաշվետվություն է
Եռօրյա պաշտոնական այց
04 Նոյ 2013  

Շեշտադրումներն ավելի վտանգավոր են, քան գումարները

2005 թվականի հոկտեմբերի 25-ին Հայաստանաի Հանրապետության Նախագահ Ռոբերտ Քոչարյանը Բրյուսել կատարած այցի ընթացքում բացառիկ հարցազրույց էր տվել "ԵՎՐԱՆՅՈՒԶ" հեռուստաընկերությանը: Այն մեծ արձագանք գտավ գրեթե ողջ Եվրոպայում, ինչպես նաև` մեր տարածաշրջանում: Պատահական չէ, որ օրեր շարունակ "ԵՎՐԱՆՅՈՒԶ"-ի այդ օրերի լրատվական թողարկումներն սկսում էին Հայաստանի մասին տեղեկություններով: Զուգադիպաբար այդ օրերին վերսկսվել էին բանակցությունները` Եվրոմիության կազմում Թուրքիայի անդամակցության շուրջ: Այսինքն աշխարհաքաղաքական սրված ու որոշիչ մի պահի հնչում են Հայաստանի Հանրապետության Նախագահի համոզիչ փաստարկները թե այդ խնդրի և թե բազմաթիվ այլ հարցերի վերաբերյալ:

Ներկայացնում ենք այդ հարցազրույցն ամբողջությամբ, որովհետև Ռոբերտ Քոչարյանի` 6 տարի առաջ արտահայտած այդ տեսակետները աշխարհաքաղաքական այսօրվա իրադարձությունների համատեքստում նույնքան հրատապ են ու հետաքրքիր: Պատահական չէ, որ այն տեղ է գտել Ռոբերտ Քոչարյանի "Ելույթներ և հարցազրույցներ. Հատընտիր" ժողովածուի մեջ: Ցավոք մենք չունենք այդ հարցազրույթցի տեսագրությունը, ուստի խնդրում ենք մեր այցելուների օժանդակությունը` այն գտնելու ձեռք բերելու հարցում:

"ԵվրոՆյուզ" - Պարոն նախագահ, բարի գալուստ "ԵվրոՆյուզ": Ձեր հարեւան Վրաստանն իր առջեւ խնդիր է դրել ինտեգրվել Եվրոպային: Հայաստանը իրեն տեսնու՞մ է Եվրամիությունում:

Ռ. ՔՈՉԱՐՅԱՆ - Կարծում եմ, այսօր ավելի իրատեսական է խոսել Եվրամիության ընդունած նոր հարեւանության քաղաքականության մասին: Բացի այդ, Եվրամիությունը վերջնականապես չի կողմնորոշվել, թե ինչքա±ն հեռու կարող են ձգվել իր սահմանները դեպի արեւելք: Ես կնախընտրեի խոսել այն իրատեսականի մասին, ինչն այսօր հնարավոր է իրականացնել: Իսկ Հայաստանի քաղաքական գործիչների ապագա սերունդները թող որոշեն, թե որտեղ կլինի Հայաստանն ապագայում:
 
"ԵվրոՆյուզ" - Նախկին խորհրդային պետություններն այսօր տարբեր ձեւով են շեշտադրում միմյանց եւ Ռուսաստանի հետ հարաբերությունները: Ինչպիսի՞ն են Հայաստանի առաջնահերթությունները հետխորհրդային տարածքում:

Ռ. ՔՈՉԱՐՅԱՆ - ԽՍՀՄ-ի փլուզումից հետո այդ ամբողջ տարածքում ստեղծվեց նոր աշխարհաքաղաքական իրավիճակ, եւ այստեղ ընտելացման գործընթաց է գնում մինչ օրս: Այս տարածքում Ռուսաստանն ամենաուժեղ պետությունն է տնտեսական եւ ռազմական առումներով: Մեզ համար Ռուսաստանն առանցքային գործընկեր է: Դա մեզ չի խանգարում հարաբերություններ հաստատել եւ նոր փոխհարաբերություններ ձեւավորել Եվրամիության, ԱՄՆ-ի, Իրանի հետ: Այսինքն, ընթանում է նոր կողմնորոշումների եւ իրավիճակների որոնման բնականոն գործընթաց, պահպանելով այն, ինչ ստեղծվել է սերունդների կողմից: Միեւնույն ժամանակ, մեր մոտ Ռուսաստանի հետ հոգեւոր մտերմությունը շատ շոշափելի է, եւ կորցնել կուտակածը, կարծում եմ, ուղղակի թեթեւամտություն կլիներ:

"ԵվրոՆյուզ" - Պարոն նախագահ, Դուք Լեռնային Ղարաբաղի հիմնահարցը, այսպես ասած, գիտեք ներսից. ծնունդով Ղարաբաղից եք, ղեկավարել եք նրա պաշտպանության կոմիտեն, եղել եք վարչապետ եւ նախագահ: Ըստ Ձեզ, ինչպիսի՞ն են Լեռնային Ղարաբաղի հակամարտության կարգավորման հեռանկարները:

Ռ. ՔՈՉԱՐՅԱՆ - Այսօր ընթանում է ակտիվ բանակցային գործընթաց, որը ես կձեւակերպեի որպես դեպի կարգավորումն ուղղված դրական շարժում: Բանակցությունների բնույթը կոնֆիդենցիալ է, եւ ես չեմ կարող խոսել բանակցային գործընթացի մանրամասների մասին, բայց կցանկանայի արտահայտել հայկական կողմի դիրքորոշումը Լեռնային Ղարաբաղի խնդրում: Խորհրդային Միության փլուզման ժամանակ այդ տարածքում Լեռնային Ղարաբաղի ժողովուրդը հանրաքվեի միջոցով իրացրեց իր ինքնորոշման իրավունքը` պահպանելով բացարձակապես բոլոր իրավական եւ ժողովրդվարական նորմերը: ԼՂՀ-ի գոյության փաստը վիճարկելի չէ: Այդ պատճառով, այսօր պետք է մտածել ավելի շուտ այն մասին, թե ինչ ճանապարհով կարելի է Լեռնային Ղարաբաղի ժողովրդին հնարավորություն ընձեռել ներգրավվելու միջազգային հանրակցությունում:

"ԵվրոՆյուզ" - Մտնելով Եվրախորհուրդ, Հայաստանը եւ Ադրբեջանը պարտավորություն ստանձնեցին Լեռնային Ղարաբաղի հակամարտությունը լուծել միայն խաղաղ ճանապարհով:Միեւնույն ժամանակ, երկու կողմերն էլ ավելացնում են իրենց ծախսերը ռազմական կարիքների համար: Դուք դրանում հակասություն չե՞ք տեսնում:

Ռ. ՔՈՉԱՐՅԱՆ - Թերեւս, ինչ-որ հակասություն այնուամենայնիվ կա, չնայած ես կառաջարկեի ծախսերի ավելացումը դիտարկել ոչ թե բացարձակ թվերով, այլ երկրի բյուջեում այդ ծախսերի չափաբաժնով: Ամեն դեպքում, ավելի կարեւորը եւ վտանգավորը այն հռետորությունն է, որն այսօր կա Ադրբեջանում, այն է` մենք ունենք եկամուտներ նավթից, մենք ի վիճակի ենք ավելացնել ռազմական բյուջեն այնքան, որ այն կստեղծի չվիճարկվող առավելություն, եւ մենք ռազմական ճանապարհով կլուծենք հիմնահարցը: Այս շեշտադրումն է վտանգավոր, այլ ոչ թե այդ գումարները:
 
"ԵվրոՆյուզ" - Հոկտեմբերի 3-ին Եվրամիությունն Անկարայի հետ սկսեց բանակցությունները Միացյալ Եվրոպայի մեջ ընդգրկվելու ուղղությամբ: Ինչպե՞ս եք վերաբերվում Եվրամիությանը Թուրքիայի անդամակցությանը:
 
Ռ. ՔՈՉԱՐՅԱՆ - Մեզ մոտ զգացմունքները հակասական են: Մի կողմից Եվրամիություն ընդգրկվելը ենթադրում է շատ լուրջ բարեփոխումներ թուրքական հասարակության վերափոխման համար: Սա ես կդասեի դրականների շարքին: Բայց կա եւ բացասականը: Առաջին անգամ է սկսվում բանակցային գործընթաց մի երկրի հետ, որը շրջափակում է իր հարեւանին եւ չի ցուցաբերում պատրաստակամություն զղջալու սեփական պատմության մռայլ էջի համար: Ահա այստեղ մտորելու տեղիք կա եւ, առաջին հերթին, եվրոպացիների համար:

"ԵվրոՆյուզ" - Պարոն նախագահ, ինչպե±ս եք գնահատում վերջերս Եվրախորհրդարանի ընդունած բանաձեւը, որով կոչ է արվում Թուրքիային ճանաչել հայերի ցեղասպանությունն Օսմանյան կայսրությունում:
 
Ռ. ՔՈՉԱՐՅԱՆ - Անկասկած, այն գնահատում եմ դրական: Եւ ոչ միայն Հայաստանը, այլ նաեւ հայկական սփյուռքը դրան բավականին ակտիվ արձագանքեց: Մնում է միայն ափսոսանք հայտնել, որ առայժմ Եվրախորհրդարանի որոշումը պարտադիր չէ Եվրոպական հանձնաժողովի համար:

Լուսանկարներ
|
ՆաԵՎ կարող է հետաքրքրել
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
22.04.2014
ՀԱՐՑԱԶՐՈՒՅՑԻ ՇԱՐՈՒՆԱԿՈՒԹՅՈՒՆ

Հարգելի այցելուներ,
Ձեր ուշադրությանն ենք ներկայացնում ՀՀ երկրորդ նախագահ Ռոբերտ Քոչարյանի՝ մեր կայքին տված հարցազրույցի շարունակությունը: Մենք խնդրել էինք նախագահ Քոչարյանին անդրադառնալ վերջին շրջանում ամենաքննարկվող թեմաներից մեկին՝ Սահմանադրության բարեփոխումներին, ինչպես նաև մի քանի այլ արդիական հարցերի: Տեղեկացնենք նաև, որ մենք հարցերի մի նոր խմբաքանակ ենք ներկայացրել երկրորդ նախագահի գրասենյակ: Հարցերն առնչվում են մի շարք օրակարգային խնդիրների. այսպես կոչված կարմիր գծերին, երթևեկության խախտումներն արձանագրող տեսախցիկներին ու տուգանքների անհամաչափությանը, Որոտանի ՀԷԿ-ի կասկածելի վաճառքին և այլն: Հուսով ենք, որ մոտ ապագայում հնարավորություն կունենանք տեղեկանալ Ռոբերտ Քոչարյանի տեսակետներին նաև այս հարցերի վերաբերյալ և մի նոր հարցազրույց կներկայացնենք մեր ընթերցողներին:  

 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
www.2rd.am և www.2nd.am կայքերի այցելուների կողմից մեզ ուղարկվող բոլոր նյութերը անկախ ձևից, քանակից և ծավալից ամբողջապես կամ հատվածաբար տեղադրվում են էջում միայն կայքի քաղաքականությանը համապատասխանելու դեպքում: